Абу Дабигийн Их дуулга тэмцээнээс монголчууд хоёр дахь алтан медалиа хүртэв. Улсын начин Б.Одхүүгийн хүү О.Цэцэнцэнгэл өчигдөр +100 кг-ын жинд аваргалснаар манай улс медалийн чансаагаар Их дуулгыг ОХУ, Их Британитай хамт тэргүүлж эхлэв.
"Монгол ойрын жилүүдэд чимээгүйхэн, аажуухан боловч итгэлтэйгээр "маш аюултай" баг бүрдүүлж байна. Тэд эрэгтэй, эмэгтэй багынхаа аль алинд гялалзсан шинэ оддыг гаргаж ирж буй орны нэг" хэмээн JudoInside сайт онцолжээ. Үнэхээр Монголын жүдочид Абу Дабигийн Их дуулгын дэвжээн дээр азтай, одтой байна. 73 кг-ын жинд дэлхийн аваргын хос медаль, олимпийн хүрэл медальт Ц.Цогтбаатар жиндээ тэргүүлж байгаа бол одоо бас хүнд жингийн бөх Одхүүгийн Цэцэнцэнгэл гарч ирлээ хэмээн уг сайтад бичсэн байна. Тэрбээр нас залуу боловч эрч хүчээ хашир, ухаантай хослуулж чадсан бөх гэдгийг ч дурджээ. Монголчууд ийнхүү Цогтбаатар, Цэцэнцэнгэлтэй, бас Саид Моллайтэй улс гэж жүдогийн төрөлжсөн сайтын тоймч бичсэн байна.
О.Цэцэнцэнгэл Абу Дабигийн Их дуулгын эхний тойрогт Румыны Владут Симионескутай хүч үзсэн байна. Хоёр бөх есөн насны зөрүүтэй, барилдааны туршлага харьцангуй байсан боловч манай бөх 30 секундын дотор ко-сото-гаке буюу бага дэгээгээр буулгаж авчээ. Тэрбээр Такикстаны Темур Рахимов, Оросын Валерий Эндовицкий, Украйны Евгений Балевский, Канадын Марк Дешенес нарыг дараалан хаяж Абу Дабигийн Их дуулгын алтан медалийн тавцанд зогсчээ.
