Сүхбаатарын талбай дээр өлсгөлөн зарлаад байсан иргэний биеийн байдлыг Сүхбаатар дүүргийн Эрүүл мэндийн төвийн эмч нар хянаж байгаа аж. Тухайн иргэний шинжилгээний хариу муу гарсан тул эмч нарын зүгээс түүнд зөвлөгөө өгсний дагуу өнөөдөр 21 цагийн орчимд өлсгөлөнгөө зогсоосон байна.
Хүний эрхийн Үндэсний комисс 2022 оны арванхоёрдугаар сарын 04-ны өдрөөс эхлэн жанжин Д.Сүхбаатарын талбайд үг хэлж, үзэл бодлоо чөлөөтэй илэрхийлж буй иргэдийн жагсаал, цуглаанд долоо дахь өдрөө ажиглалт, дүн шинжилгээ хийж байгаа аж. Жагсаал, цуглааны үеэр согтууруулах ундаа хэрэглэсэн, нийгмийн хэв журам зөрчиж жагсагчдын болон иргэний нийгмийн ажилчдын биед халдсан асуудал гарч байгаа тул иргэд жагсаж цуглахдаа бусдын эрх чөлөөнд халдаж, нийгмийн дэг журам зөрчихгүй байхад ХЭҮК-оос анхааруулж буй.
ХЭҮК-оос хүний эрхийн чиглэлээр үйл ажиллагаа явуулдаг иргэний нийгмийн байгууллагуудтай хамтарч хүний эрхийн хэрэгжилтийг хангах, зөрчигдсөн эрхийг сэргээх чиглэлээр онцгойлон анхаарал хандуулан ажиллаж байгаа юм. Жагсаал цуглааны үеэр нийгмийн дэг журам зөрчсөн гэх 15 иргэнийг хууль сахиулах байгууллагаас саатуулсан бөгөөд Комиссын гишүүд болон Эрүү шүүлтээс урьдчилан сэргийлэх асуудал эрхэлсэн гишүүд саатуулагдсан иргэдтэй уулзаж, Монголын Өмгөөлөгчийн холбоотой хамтран хууль зүйн туслалцаа үзүүлсэн байна.
