Индонезийн парламент мягмар гарагт баталсан Эрүүгийн хуулийн шинэчилсэн найруулгадаа гэрлэлтээс гадуур бэлгийн харьцаанд орохыг хориглож ,гэрлээгүй хосууд хамт амьдарвал зургаан сар шоронд хорих эсвэл дээд тал нь 10 сая рупи буюу 710 доллараар торгуулах заалт оруулжээ. Уг хуулийг гурван жилийн дараагаас хэрэгжүүлж эхлэхээр заасан байна.
Энэ хуультай холбоотойгоор Индонези улс "ардчилсан" гэсэн тодотголоо нураалаа гэх шүүмжлэл гараад байна. Хувь хүмүүсийн хувийн шийдвэрийг гэмт хэрэг гэж үзэх нь байж боломгүй хэрэг хэмээн үзэх талууд олон байна. Тус улсын сонины редакцууд шинэ хуулийг буруушааж, өдөр тутмын Коран Темпо сонин энэ шийдвэрийг "эрх мэдлээр далайлгасан" өнгө аястай гэж бичсэн бол Жакарта Пост сонин хуулийн хэрэгжилтэд маш их санаа зовниж байна" гэж бичжээ. Индонезийн Хууль зүйн туслалцааны сангийн тэргүүн Мухамад Иснур "олон улсын хүний эрхийн хэм хэмжээнд харшилж байна" гэж үзэж буйгаа мэдэгдсэн байна. Мөн шинэчилсэн найруулгыг эсэргүүцсэн жагсаал нийслэл хотод нь болжээ.
Шинэ хууль нь гадаадын иргэдэд ч үйлчлэх тул Индонези улсаас хөрөнгө оруулагч, жуулчид, оюутнууд татгалзахад хүргэнэ гэж шүүмжлэгчид анхааруулж байгаа юм. Харин хууль батлагчид шинэ хуулиар эцэг эх, эхнэр/нөхөр, хүүхэд гэх мэт ойр дотны хүнээс мэдүүлэг гаргасны дараа л цагдаа баривчлах боломжтой гэж заасан тул гадаадын иргэнд эрүүгийн хариуцлага хүлээлгэх магадлал тун бага гэж үзэж байгаа аж.
Тус улсад 2019 онд үүнтэй төстэй хуулийн төслийг батлах гэж оролдсон ч олон арван мянган залуус гудамжинд жагсаал хийсний дараа Ерөнхийлөгч Жоко Вивидо уг төслийг зогсоож байв. Харин энэ удаад 11-р сарын 30-ны өдөр хууль тогтоогчид УИХ-аар төслийг соёрхон батлах гэж байгаа тухайгаа гэнэт зарлаж, жагсаал цуглаан зохион байгуулах хугацаа бараг өгөөгүй байна.
Индонезийн Хууль зүй, хүний эрхийн дэд сайд Эдвард Омар Шариф Хиариеж, засгийн газар аль болох олон намын төлөөлийг оруулж хэлэлцүүлэхийг хичээсэн ч энэ шинэчлэл нь "бүх хүний сэтгэлд нийцэхгүй" гэдгийг хүлээн зөвшөөрч байна. "Үндсэн хуулиар олгогдсон эрх нь зөрчигдсөн гэж үзэж байгаа иргэд байвал Үндсэн хуулийн цэцийн үүд хаалга нээлттэй" гэж хэлжээ.
Эрүүгийн хуулийн шинэчилсэн найруулгаар жагсаал хийсэн хүмүүсийг мөн шийтгэх, Индонезийн ерөнхийлөгч болон дэд ерөнхийлөгчийн аль алиных нь нэр төр, нэр төрд халдахыг хориглосон заалт ч оруулсан байна.
