Томуугийн вакциныг 21 аймаг, нийслэлийн 9 дүүрэгт хуваарилж, улсын хэмжээнд уг вакциныг 1-5 насныхан, жирэмсэн эх, 65-аас дээш насны эрсдэлт бүлгийнхэнд сайн дурын үндсэн дээр хийж эхлээд байна. Энэ оны хувьд 1-5 насны 210 мянган хүүхдэд вакцин хийхээр төлөвлөсөн бөгөөд одоогоор 2500 гаруй хүүхдийг вакцинжуулжээ. Вакцинд хамрагдахын тулд таны хүүхэд нэг сарын хугацаанд ямар нэгэн вакцин хийлгээгүй, халуураагүй, ханиадгүй, долоо хоногийн хугацаанд антибиоток уугаагүй байх ёстой юм байна. Харин вакцин хийлгэсний дараа гурав хоногт гам маш сайн барьж дааруулахгүй, хүйтэн зүйл уулгахгүй, тариулсан хэсэгт бохир гар хүргэх, дарж унтах зэргээр даралт өгөхгүй байхыг эмч зөвлөв.
Мөн өмнө нь ковид хүнд туссан бол вакцин хийлгэх нь ханиад томуу хүндрэхгүй хөнгөн тусахад нөлөөлөх юм байна.
Вакциныг өрх дүүргийн эмнэлэгт хийлгэх боломжтой.
