Хэдхэн жилийн өмнө МАНАН бүлэглэлийн эсрэг тэмцэл хийж явсан таван улстөрчийн хувь тавилан хааш эргэснийг эргэн сануулъя. Тэд өөрсдийгөө "шударга тав" хэмээн нэрийдэж нийслэлийн төв талбайд эсэргүүцлийн том жагсаал хийж байлаа. Гол зорилго нь М.Энхболдыг УИХ-ын даргаас огцруулах байсан санагдана. Тэд зорилгодоо хүрсэн. Тухайн Үед УИХ-ын даргаар ажиллаж байсан М.Энхболд албан тушаалаасаа огцорч, улс төрийн амьдралд идэвхьэй нэгэн байхаа больсон. Ж.Батзандан, Лу.Болд нар УИХ дахь АН-ын бүлгийг хагалж, цөөнх парламентад бие даасан бүлэггүй болж байв. Шинэ нам гэж тоглоомын нам ч байгуулагдсан.
Энэ үйл явдлын дараа Лу.Болд Европын холбоонд Элчин сайдаар, Ж.Батзандан Австрали руу ЭСЯ-нд ажиллахаар томилогдсон. Томилогдсон гэхээсээ илүүтэйгээр АН-ыг бүлэггүй болгосон шагналаа хүртсэн гэж олон нийт шүүмжилдэг. Ж.Батзандан олны хэл амыг дарж хэсэг зуур Австралид байж байгаад уйдлаа барилаа болоод Монголдоо эргэн ирсэн. Л.Оюун-Эрдэнэ эдүгээ Ерөнхий сайд, МАН-ын дарга болон дэвшжээ. Х.Нямбаатар хууль зүй, дотоод хэргийн сайд болов. Т.Аюурсайхан УИХ-ын дэд дарга гэсэн сонгуульт албатай байж байгаад өнгөрсөн долоо хоногт Нийгмийн хамгаалал, хөдөлмөрийн сайдаар томилогдлоо. Шударга таваас дөрөв нь улс төрийн болоод төрийн эрх мэдэл атгажээ.
Харин Ж.Батзандан хөгжлийн банкнаас 14 тэрбум төгрөгийн зээл аваад зориулалтын бусаар зарцуулсан гэх үндэслэлээр торны цаана сууж байна. МАН-ын гишүүн төрсөн ах Ж.Бат-Эрдэнэ нь Дарханы замын гүйцэтгэгч компаниудаас хахууль авсан байж магадгүй гэсэн үндэслэлээр мөн шалгагдаж эхэлсэн. Эндээс харахад шударга тавын дөрөв нь ордонд, нэг нь шоронд суужээ. Монголчууд эртнээс урвагчдыг үздэггүй. Энэ л зарчмаар АН-ыг хүчгүйдүүлж явсан Ж.Батзандан эдийн засгийн ноцтой гэмт хэрэгт холбогдон шалгуулж байгаа нь үйлийн үр ч юм шиг. Үйл явдал цааш хэрхэн хөврөхийг харах үлдлээ.
