Хятадын Коммунист намын ХХ их хурал өчигдөр буюу аравдугаар сарын 16-нд Бээжин хотноо нээлтээ хийжээ. БНХАУ ойрын таван жил, түүнээс ч урт хугацааны хөгжлийн төлөвлөгөөг гаргах энэхүү их хурал тус улсын 1 тэрбум 400 сая гаруй иргэдийн төдийгүй дэлхий нийтийн анхаарлыг ч ихээхэн татсаар байна.
Эх сурвалжийн мэдээлснээр, нийт 80 гаруй улс орон, бүс нутгийн, мөн 210 гаруй хэвлэл мэдээллийн хэрэгслийн 2500 орчим сэтгүүлч уг их хурлыг мэдээлэхээр ажиллаж байгаа аж. Мөн Хятадын 750 орчим сэтгүүлч их хурлыг сурвалжилж байгаа юм байна.
ХКН-ын Ерөнхий нарийн бичгийн дарга Ши Жиньпин их хуралд тавьсан илтгэлдээ "ард түмэн" гэдэг үг олон давтамжтай хэлжээ. ХКН байгуулагдсаныхаа 100 жилийн ойг тэмдэглэсэн, Хятадын онцлогтой социалист шинэ эрин үед орсон, ядуурлаас ангижирч дундаж чинээлэг нийгмийг байгуулах түүхэн үүргээ биелүүлж, нэгдүгээр зуун жилийн зорилтоо биелүүлсэн гэдгийг Ши Жиньпин илтгэлдээ дурдсан байна.
2020-2035 онд Хятад улс орчин үеийн социализмыг үндсэндээ байгуулж, 2035 оноос энэ зууны дунд үе хүртэл баян чинээлэг, ардчилсан, соёлтой, эв найртай, үзэсгэлэнт, орчин үеийн социалист хүчирхэг улс орныг байгуулах төлөвлөгөө боловсруулсан. Тэр үед Хятадын ард түмэн илүү баян чинээлэг, сайн сайхан амьдрал эдэлж, ард түмнээр төв болгосон хөгжлийн үзэл баримтлал илүү их бодит хүчээ харуулах болно хэмээн мөн тэрбээр онцолжээ.
