“Хустайн цогцолборт газар” төв, Их говийн дархан цаазат газрын Б хэсэг, “Хомын талын тахь” ТББ, “Олон улсын тахь” группээс Монголд тахь сэргээн нутагшуулсны 30 жилийн ойн талаар мэдээлэл хийлээ.
Монгол Улсад тахь сэргээн нутагшуулах ажлыг 1992 онд Европ, Австрали тивийн амьтны хүрээлэн эхлүүлж, анх Төв аймгийн Хустайн нуруунд 15, Говийн их дархан цаазат газрын “Б” хэсэгт 5 толгой тахийг зөөвөрлөн авчирсан түүхтэй. Үүний дараа Завхан аймгийн Хомын талд 2004 онд 12 толгой тахь авчирсан байдаг.
Энэ нь дэлхийн байгаль хамгаалах холбооны Улаан дансны ангилал, шалгуураар 1969-1996 он хүртэл “Байгальд устсан” ангилалд байсан тахийг эх нутагт нь амжилттай сэргээн нутагшуулж, 2008 онд “Устаж байгаа”, 2011 онд “Устаж болзошгүй” гэх ховордлын хоёр ч зэрэглэл бууруулсан амжилт гаргасан үзүүлэлт юм.
Өдгөө Чех улстай хамтран тахь нутагшуулах дөрөв дэх газрыг судалж байгаа билээ.
