УИХ дахь АН-ын бүлгийн гишүүн Н.Ганибал, Ш.Адъшаа болон ХҮН-ын дарга Т.Доржханд нарын гомдлоор Үндсэн хуулийн цэц маргаан үүсгэжээ. Өмнөх парламентын баталсан Үндсэн хуулийн нэмэлт, өөрчлөлтөд дөрвөөс бусад сайдыг УИХ-ын гаднаас бүрдүүлэхээр суулгаж өгснийг тэд Үндсэн хууль зөрчиж байна гэж энэ гурван гишүүн "гомдоод" яваа юм байна л даа. Давхар дээл буюу УИХ-ын гишүүд Засгийн газрын гишүүнээр хавсран ажиллаж засаглалын хил хязгаарыг бантагнуулдаг, бужигнуулдаг явдлыг зогсоосон боловч Цэц дээр дахин амилуулж мэдэхээр болж байна. Цэц уг асуудлаар маргаан үүсгэсэн тул 2019 онд УИХ-аар батлагдаж, 2020 оны тавдугаар сарын 25-наас даган мөрдөж эхэлсэн Үндсэн хуулийн нэмэлт, өөрчлөлт Үндсэн хууль зөрчсөн эсэх асуудлыг ирэх даваа гарагт шийднэ.
Эрх баригчид АН-ын бүлэг дэх өөрсдийн гар хөл болсон гишүүдээр Цэцэд гомдол өгүүлсэн гэж хэвлэлүүд бичиж байна. Ингэж хардах бодитой үндэслэл ч бий. АН-ын бүлэг дотор баахан бужигнаан үүсэхэд "бидон" хочит Д.Ганбат гишүүн МАН-аас 3 сайдын суудал нэхсэн нь ил болсон юм. МАН УИХ-д үнэмлэхүй олонхын суудалтай энэ үед арайхийн бүлэг байгуулах хэмжээний суудал авсан АН-д сайдын суудал өгөх нь бараг боломжгүй. Гэхдээ Засгийн газарт урих юм шиг итгэл төрүүлж молигодож байгаад Цэцэд өргөдөл өгүүлж, давхар дээлтэй сайд нарыг дахин төрүүлэх хүслээ хүний гараар гүйцэлдүүлэх хэмжээний зальжин нүүдлийг МАН өлхөн хийнэ.
МАН гэхээсээ илүү сайдын суудлыг сэрүүн зүүдэлж яваа УИХ дахь МАН-ын бүлгийн нэр бүхий гишүүдийн хатгаас гэвэл үнэнд арай ойртоно. Балчир ес эхэлж байгаа энэ өдрүүдэд дээлээ давхарлах хүслээ гүйцээх гэсэн УИХ-ын гишүүд сүүлчийн сумаа тавьцгааж байна. Цэц хэрэв Үндсэн хууль зөрчсөн байна гэсэн дүгнэлт гаргавал засаглалын хямрал жинхэнэ утгаараа нүүрлэнэ. Өнөөх 76 чинь бараг бүгдээрээ сайд болох гэж чичирнэ, төрийн ажлыг гацаана. АН-ын бүлэгт сайдын суудал өгнө гэдэг угаасаа үлгэр. Өөрсдийнхөө 62 гишүүний албан тушаалын шуналыг барахгүй зовж яваа шүү дээ. Ерөнхий сайд, МАН-ын дарга Л.Оюун-Эрдэнэ шинэ сорилттой тулгарна.
Засаглал хуваах онолоор бол УИХ Засгийн газарт хяналт тавих л үүрэгтэй. Ерөнхий сайд УИХ-ын өмнө хуулийн хэрэгжилтийг хариуцдаг. Түүнээс биш гүйцэтгэх засаглалд хяналт тавих үүрэгтэй УИХ-ын гишүүд Засгийн газрын танхимд олноороо ороод суучихвал засаглал хоорондоо цус холилдож, УИХ-ын чадамж асар ихээр доройтдогийг олон жишээ бидэнд харуулсан. Тэгээд ч Үндсэн хуульд нэмэлт, өөрчлөлт оруулсан автор нь МАН өөрөө шүү дээ. Өчигдөрхөн хийсэн зүйлээ өнөөдөр үгүйсгэх нь олон нийтийн итгэлийг сулруулна. Давхар дээл мөрөөдсөн албан тушаалын хэнээтэй УИХ-ын гишүүдийн хүслийг хангах уу, эс биелүүлэх үү гэдгээ Цэц мэднэ.
