Өнөөдөр хэвлэл мэдээллийн редакциуд нэгдэж Улсын Ерөнхий Прокурор Б.Жаргалсайханд Хөгжлийн банкны асуудлаар шаардлага хүргүүлсэн. Энэ үеэр Хөгжлийн банкны чанаргүй зээлдэгчдийг шалгаж буй ажлын явцын талаар Нийслэлийн прокурорын газрын Ерөнхий прокурор Ц.Ариунболд мэдээлэл өглөө.
Тэрбээр “Өнгөрсөн хугацаанд Хөгжлийн банктай холбоотой асуудлаар 29 хэрэгт хэрэг бүртгэл нээж, 12 хэрэгт мөрдөн байцаалтын ажиллагаа явуулж байна. Нийт 41 хэргийг прокурорын байгууллага шалгаж байна. Хөгжлийн банкны 2 их наяд 383 тэрбум төгрөгийн чанаргүй зээлтэй холбоотойгоор 74 аж ахуйн нэгжийг шалгаж байгаа. Албан тушаалаа урвуулан ашигласан, мөнгө угаасан гэмт хэргийн шинжтэй үйлдэл байна уу гэдгийг шалгаж хэрэг бүртгэл, мөрдөн байцаалтын ажиллагаа хийгдэж байна. Мөрдөн байцаалтын ажиллагаа явагдаж буй 12 хэрэгт 22 хүнийг холбогдуулан шалгаж байгаа дээрх 22 хүний 14 нь хөгжлийн банкны албан тушаалтнууд 8 нь аж ахуй нэгжийн эрх бүхий албан тушаалтан байна. Хөгжлийн банканд учирсан хохирлыг нөхөн төлүүлэх зорилгоор 61 иргэний 664 үл хөдлөх хөрөнгө, 763 тээврийн хэрэгслийг битүүмжилж, арилжааны банк нь дахь 104 дансыг хааж, 25 аж ахуйн нэгжийн хувьцаа арилжаалах эрхийн зогсоогоод байна. Одоогоор шалгагдаж буй хүмүүсийн нэрийг хэлэх боломжгүй. Хэрэг бүртгэл нээж шалгаж байгаа хүмүүсийн дунд УИХ-ын гишүүд байхгүй” гэв.
