Монгол Улсын Хүний эрхийн Үндэсний Комиссын ажлын хэсэг “Хүний эрхийн төлөө хамтдаа” нээлттэй өдөрлөгийг Ховд аймагт зохион байгууллаа. Өдөрлөгийн хүрээнд Ховд аймгийн Цагдаагийн газрын үйл ажиллагаа, хүүхэд бэлгийн хүчирхийллийн хохирогч болсон хэргийн мөрдөн шалгах ажиллагааны талаарх нөхцөл байдал, эрүүлжүүлэх, саатуулах байрны орчин, нөхцөл байдалтай танилцав. Мөн Ховд аймаг дахь Шүүхийн шийдвэр гүйцэтгэх газрын Цагдан хорих байрны нөхцөл байдал, аймгийн Онцгой байдлын газар, Бүсийн шүүх, шинжилгээний төвийн үйл ажиллагаа, орчин нөхцөлтэй танилцаж, тулгамдсан асуудлаар мэдээлэл солилцлоо. Түүнчлэн “Хүний эрхийг хангах үндэсний хөтөлбөр-II” төслийн талаар Орон нутаг хариуцсан хэлтсийн дарга Д.Ёндонжамц иргэдэд танилцуулж, орон нутаг дахь хүний эрх, эрх чөлөөний нөхцөл байдлын талаар санал солилцох уулзалт хэлэлцүүлэг зохион байгуулав.
Аймгийн Прокурорын болон Цагдаагийн газар, Шүүхийн шийдвэр гүйцэтгэх газар, Шүүх шинжилгээний хэлтэс, Онцгой байдлын газрын удирдлага, эрх бүхий албан тушаалтнуудыг оролцуулан “Шударгаар шүүлгэх эрх” хэлэлцүүлгийг зохион байгуулав. Хэлэлцүүлгээр Комиссын гишүүн Б.Энхболд Монгол Улс дахь хүний эрх, эрх чөлөөний байдлын талаарх 24 дэх илтгэлийн VI бүлэгт тусгагдсан “Шударгаар шүүлгэх эрхийн хэрэгжилт”-ийн талаарх дүгнэлт, санал, Эрүүгийн хэрэг хянан шийдвэрлэх тухай хуульд орсон нэмэлт өөрчлөлт, үзэл баримтлалыг танилцуулж, орон нутаг дахь нөхцөл байдал, хэрэг бүртгэх, мөрдөн байцаах ажиллагааны явцад хүний эрхийг зөрчихөөс урьдчилан сэргийлэх чиглэлээр хэлэлцүүлэг өрнүүллээ.
Түүнчлэн Ховд их сургуулийн эрх зүйн ангийн оюутан суралцагчидтай уулзаж, Комиссын гишүүн Б.Энхболд Комиссын чиг үүрэг, үйл ажиллагаа, референт Б.Золжаргал Хүний эрхийн ойлголт сэдэвт сургалт зохион байгуулав. Ажлын хэсэг 2025 оны есдүгээр сарын 18, 19-ний өдөр “Хүний эрхийн төлөө хамтдаа” нээлттэй өдөрлөгийг Ховд аймгийн Булган суманд, хяналт шалгалтын ажлыг Үенч суманд зохион байгуулан ажиллана.
