Нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд Шударга өрсөлдөөн хэрэглэгчийн төлөө газрын дарга асан О.Магнай нарын нэр бүхий шүүгдэгч нарт холбогдох шүүх хурал болж өнөөдөр /2025.09.04/ эцэслэж шийдвэрээ танилцууллаа.
Шүүхээс О.Магнайгийн нийтийн албанд томилогдох эрхийг хоёр жилээр хасаж, зорчих эрхийг нэг жилээр хязгаарлах, мөн 500 сая төгрөг гаргуулж, улсын орлого болгохоор шийдвэрлэлээ.
Түүнийг албан тушаалаа урвуулан ашиглаж өөртөө болон бусдад давуу байдал бий болгосон гэмт буруутайд тооцсон юм. Мөн нийслэлийн газрын албаны дарга асан Э.Болорчулууныг албан тушаалын байдлаа урвуулан ашиглаж, өөртөө болон бусдад давуу байдал бий болгох гэмт хэрэгт гүйцэтгэгч болон зохион байгуулагчаар оролцсон, гэм буруутайд тооцов.
Мөн шүүгдэгч н.Шижирийг албан тушаалын байдлаа урвуулан ашиглаж, өөртөө болон бусдад давуу байдал бий болгох гэмт хэрэгт гүйцэтгэгч хамтран зохион байгуулагчаар орлцсон гэмт буруутайд тооцлоо. Шүүгдэгч Б.Бямбацогтыг буруу мэдээлэл өгсөн гэм буруутайд тооцов. Шүүгдэгч Ц.Алтанцэцэгийг нийтийн албан тушаалтан албан тушаалын байдлаа урвуулан ашиглан хамтран ажилласан гэм буруутайд тооцлоо. Шүүгдэгч Ш.Ядамдорж, Х.Эрдэнэ нарыг нийтийн албан тушаалтан албан тушаалын байдлаа урвуулан ашиглаж хамжигчаар оролцсон гэм буруутайд тооцов. Харин н.Батцэрэн, н.Идэрчулуун нарт холбогдох хэргийг хэргийг хөөн хэлэлцэх хугацаа дууссан үндэслэлээр хэрэгсэхгүй болгов.
Ингээд Э.Болорчулууны нийтийн албанд томилогдох эрхийг 3 жилээр хасаж, зорчих эрхийг гурван жилээр хязгаарлах ялаар. н.Шижирийг нийтийн албанд томилдох эрхийг гурван жилээр хасаж, зорчих эрхийг гурван жилээр хязгаарлах ялаар шийтгэлээ.Б.Бямбацогтыг нэг сая төгрөгөөр торгох ялаар шийтгэсэн бол Ц.Алтанцэцэгийг хоёр жилийн хугацаагаар нийтийн албанд томилогдох рэхийг хязгаарлаж, нэг жилээр зорчих эрхийг хязгаарлав.
Ш.Ядамдоржийг нийтийн албанд томилогдох эрхийг хоёр жилийн хугацаатай хасаж, 15 сая төгргөөр торгох, мөн зургаан сарын хугацаагаар зорчих эрийг хязгаарлалаа.
Н.Эрдэнийг 15 сая төгрөгөөр торгох, 6 сарын хугацаагаар зорчих эрхийг хязгаарлах, н.Шижирт зорчих эрхийн хязгаарлах ялыг дөрвөн жилийн хугацаагаар, Ш.Ядамждорж,Х. Эрдэнэ нарт оногдуулсан торгох ял болон зорчих ялыг тус тусад нь эдлүүлэх. Ш.Ядамдоржийн баривчлагдсан, н.Шижирийн цагдан хоригдсон хугацааг эдлэх ялд тооцно.
Б.Бямбацогтод оногдуулсан торгох ялыг 90 хоногийн хугацаагаар, Ш.Ядамждорж, н.Эрдэнэ нарын торгох ялыг нэг жилийн хугацаанд хэсэгчлэн төлүүлэх хуулийн хугацаа тогтоож, биелэгдэгдээгүй тохиолдолд 1 хоногийг 15 мянган төгрөгөөр тооцож, хорих ялаар солихыг анхааруулав.
Э.Болорчулуун, н.Шижир, Ядамдорж, н.Эрдэнэ, О.Магнай,Ц. Алтанцэцэг нарыг байнга оршин суух дүүргийн нутаг дэвсгэрээс гарахыг хориглож, шүүхээс оногдуулсан зорчих эрхийг хязгаарлах ялыг шүүгдэгч нар биелүүлээгүй бол зорчих эрхийг хязгаарлах нэг хоногийг хорих ялаар солихыг анхааруулав.
О.Магнай нь ШӨХТГ-ын дарга байхдаа Шүүхийн шийдвэр гүйцэтгэлийн ерөнхий газрын харьяа Хяналт шалгалт, үнэлгээ, дотоод аудитын газрын даргаар ажиллаж буй, хурандаа Б.Цогжаргалд хөндлөнгөөс нөлөөлж, улмаар Б.Цогжаргалын тушаалаар шийдвэр гүйцэтгэгч Г.Идэрчулуун, Х.Саруул, Б.Батцэрэн нар Баянгол дүүргийн нутагт Ливан улсын иргэн Мохамад Зухуэр Итаны хөрөнгөө оруулж барьсан 11 давхар шилэн фасадтай, дөрвөн тэрбум төгрөгийн өртөгтэй барилгыг 723 саяар үнэлэн О.Магнайгийн ээж С.Отгонжаргалын “Дархан цамхаг” компанид шилжүүлсэн.
Дээрх гадаадын иргэнд О.Магнай 2014 онд 300 мянган ам.доллароор зарсан газар дээрээ барилга бариулчихаад үнэлүүлж шилжүүлэн авахад шийдвэр гүйцэтгэгч нар албан тушаалаа ашиглан оролцсон хэрэгт холбогдсон. НШШГГ-ын ажилтнууд 2018 оны тавдугаар сарын 16-нд шийдвэр гүйцэтгэх ажиллагаа явуулж дээрх Ливаны иргэний эзэмшлийн “Седарс партнерс” ХХК-ийн мэдэлд байсан 11 давхар объектыг хураан авч, 724 сая төгрөгөөр үнэлж, хоёр хоногийн дараа О.Магнайгийн хамаарал бүхий “Дархан цамхаг” ХХК-д шилжүүлсэн зэрэг хэрэгт буруутай гэж үзсэн юм.
