ОХУ-ын ерөнхийлөгч Владимир Путин Кремлийн ойролцоох тансаг гэрээ танилцуулсан бичлэгээ дэлгэлээ. Энэхүү бичлэгийг түүний анх ерөнхийлөгчийн тангарагаа өргөснөөс хойш 25 жилийн ойг тохиолдуулсан баримтат кино хийх үедээ хувийн амьдралыг нь харуулах зорилгоор авчээ.
Алтадмал модон тавилга, цагаан төгөлдөр хуур, иж бүрэн хэрэгслүүдтэй биеийн тамирын заал зэргээ Путин энэ үеэр үзүүлсэн байна. Мөн костюм, цамцаар дүүрэн хувцасны өрөөгөө ч үзүүлэв. Түүний гэр Кремлийн ойролцоо байдаг бөгөөд "Таны харж байгаагаар гэр маань тийм ч хол биш" гэж тэрээр сэтгүүлчид цонхоор Кремлийг харуулангаа хэлэв.
Путины том охин 39 настай Мария, 37 настай Катерина нараас төрсөн ач зээ нарынх нь талаар асуухад Путин тэд хааяа гэрт нь гэнэт зочилдог тухай хуучилжээ. Түүнийг хатуу өвөө байх гэсэн таамагт "Үгүй, үгүй!" гэж эрсхэн хариулсан байна.
"Украин болон Барууны орнууд сүүлийн гурван жилийн хугацаанд Оросыг өдөөн хатгаж, биднийг алдаа гаргахыг хүссэн. Өнгөрсөн хугацаанд цөмийн зэвсэг ашиглахыг бодоогүй. Цаашид ч ашиглах шаардлага гарахгүй гэж найдаж байна" гэж Путин энэ үеэр ярилаа.
