БНХАУ-ын Хайнань мужийн Санъяа хотыг монголчууд сайн мэдэх болжээ. Аялал жуулчлалын томоохон бүс болсон энэ мужийн төв хотод Хятадын үндэсний цөөнхийн 12 дахь уламжлалт наадам энэ сарын 22-ноос 30-ны өдрүүдэд болж байна. 1953 онд анх эхэлсэн энэ наадам дөрвөн жил тутамд нэг болдог аж. Уг наадам спортын 18 төрлөөр явагддаг байна. Спортын эдгээр төрлүүдээс бөхийн төрлүүд нь тун сонирхолтой. Тухайлбал, хотон үндэстний бан жио бөх олны анхаарлыг ихээхэн татдаг байна. Бан жио бөхийн дүрэм нь өрсөлдөгчөө биеэр нь газар унагаад өөрөө босоо үлдвэл гурван оноо, дугуй тойргоос түлхэж гаргах, хөмөрч дарж унах зэрэгт нэг оноо авдаг байна.
