УИХ-ын ээлжит сонгуульд нэр дэвшигчид урьд шөнө тодорлоо. Горилогчдын тэн хагас нь гомдогсдын эгнээ рүү шилжиж, зарим нь намаасаа гарна гэж хүүхэд шиг айлгаж, нөгөө нэг нь “Энэ наадмыг чинь үзэхгүй ээ” хэмээн хаалга савацгааж байна. Жагсаалтад хэн хэн орох вэ гэдэгт АН ч тэр, МАН ч тэр халуухан үзэлцжээ. Тойрогт нэр дэвшигчдийг тодруулах үйл явц бүр ч алаан болсон байна. Зах зухаас нь сошиал орчинд дэлгэгдсэн. Ардчилсан намын хувьд хэрүүл зодоон, хэлцэл зөвшилцөл нь ил байдаг тул олны анхааралд илүүтэй өртөх шиг боллоо. Тэрнээс биш МАН-ын цагаан байшинд бас л нанчилдаан болсон л сураг дуулдана.
Ардчилсан намын жагсаалтад багтах, тэр тусмаа эхний 10-т, үгүй ядаж 15 дотор нэрээ бичүүлэх хүсэлтэй хүмүүс олон байв. Хамгийн их хэл ам, хэрүүл тэмцэл хийсэн нь Ерөнхийлөгч асан Х.Баттулга, УИХ-ын гишүүн асан Х.Тэмүүжин, З.Нарантуяа гээд цааш багагүй жагсаалт хөвөрнө. Х.Тэмүүжингийн хувьд С.Баярцогттой барьцаж жагсаалтад орно гэж дайрсаар С.Баярцогтыг тойрог руу шидүүлж, өөрөө жагсаалтын есдүгээрт бичүүлж санаа амрав. Тэрбээр жагсаалтад орж чадахгүй бол Хан-Уул дүүрэгт нэр дэвших барьцаа, шахаатай байжээ. Х.Тэмүүжин Хан-Уулд нэр дэвшсэн бол тус тойргийн зураглал нэлээд өөрчлөгдөхөөр байв. Урьдчилсан байдлаар Хан-Уулын 12-р тойрогт Ардчилсан намаас Б.Ариунболд, Э.Тамир, О.Тэнүүн гурав нэр дэвших нь тодорхой болчихоод байсан юм. Тиймээс Х.Тэмүүжин крандуулаад ороод ирлээ гэхэд халуун гал дээр нүцгэн бөгсөөрөө суухаас дор юм тэнд өрнөх байв.
Экс хууль зүйн сайд хэл амныхаа хүчээр намын жагсаалтад галтай, хиншүүтэй ч гэлээ багтаж санаа амарсан ч Хан-Уулын тойрогт энх амгалан тогтсонгүй. Ардчилсан намын дарга Л.Гантөмөр өөрийн хүн сэтгүүлч Ч.Лодойсамбууг тус тойрог руу ногоон гэрлээр илгээснээр шарк О.Тэнүүн байнд ч үгүй, банзанд ч үгүй хоцорлоо. Хан-Уулын нөгөө хоёр нэр дэвшигч Б.Ариунболд, Э.Тамир нарын хувьд шаркийг бодвол АН-ын ҮБХ дээр заалнаас олны дэмжлэг авсан, дүүрэгтээ ч дэмжлэг сайтай байсан учир мандатаа авч чаджээ. Ер нь Хан-Уул дүүрэгт АН-аас нэр дэвшихээр горилогчид элийрэгч Ц.Уянга, комедиан Амараа гээд тун олон байв. Тэр хэрээр ширүүн өрсөлдөөн хөшигний цаана өрнөж, шийртэй нь үлдэж, шинэ зарим хүн крандуулан иржээ.
