Ерөнхий сайд Л.Оюун-Эрдэнэ захиргааны эрх мэдэл дээрээ нэмээд улс төрийн эрх мэдлээ баталгаажууллаа. Эрх баригч МАН-ын 30-р Их хурлын төлөөлөгчид түүнийг дуу нэгтэйгээр дэмжиж, намын даргаараа сонголоо. Түүнтэй өрсөлдөх хүн МАН-ын Их хурлын 1200 гаруй төлөөлөгч нарын дунд байсангүй. МАН доторх Хотын фракц, үе үехэн сураг нь дуулддаг жигүүр, сонгуулийн өмнө нам дотроо амилдаг элдэв хөдөлгөөний эсэргүүцэл тэмцэл ч гарсангүй. Хэдийгээр МАН дотор эрх мэдлийн төлөөх гардан тулаан байхгүй ч энэ намын гай, гавьяа хоёр Л.Оюун-Эрдэнэ гэдэг даргын нэр дээр энэ цаг мөчөөс эхлэн бичигдэх болно. Товчхондоо бол үүрэх ачаатайгаа дүйх эрх мэдлийг Л.Оюун-Эрдэнэ бүрэн авлаа.
Л.Оюун-Эрдэнийн намынхаа Их хуралд танилцуулсан "Шинэ сэргэлтийн бодлого"-ыг хэвлэлүүд онцолж байна. Алсын хараа 2050 урт хугацаан хөгжлийн баримт бичгийг боловсруулалцсан хүний хувьд Л.Оюун-Эрдэнэ нэлээн зоримог алхмуудыг хэрэгжүүлэхээр таницуулсан. Авлигын хэрэгт холбогдсон, шүүхээр нотдлогдсон албан тушаалтныг намынхаа гишүүнчлэлээс үг дуугүй хасна, ардчиллыг бэхжүүлнэ, хуулийн засаглалыг хамгаална гэх мэт амлалтууд зарим хүнд популимзм шиг сонсогдсон байхыг үгүйсгэхгүй. Гэхдээ эрх баригч улс төрийн намын удирдлагууд авлигатай тэмцэнэ, хүний эрхийг дээдэлнэ, хувийн хэвшил, бизнесүүдийг дэмжинэ гэсэн амлалт өгч байгаа нь овоо доо гэж бодож болох үйлдэл мөн.
МАН-ын 30-р Их хурлын индэр дээрээс эрх баригч намын удирдлагууд ийм тодорхой амлалт өгч, "Шинэ сэргэлтийн бодлого" хэрэгжүүлнэ гэдгээ зарласан. Бодлого, хөтөлбөрийн нэр ямар ч байж болно. Гол нь шинжлэх ухаанд, тооцоо судалгаанд үндэслэсэн байх учиртай. Алсын хараа 2050 урт хугацааны баримт бичгийг нухалцсан хүний хувьд Л.Оюун-Эрдэнэд бодлогоо амьдралд хэрэгжүүлэх боломж цэлийтэл нээгдэж байна. Цаг хугацаа хяслантай. Ерөнхий сайд байх хугацаа буюу 2024 он хүртэл бүгдийг өргөс авсан мэт өөрчлөх ямар ч боломжгүй. Гэхдээ захиргааны болоод улс төрийн эрх мэдлийг хамтад нь атгаж буйн хувьд ухрах, няцах ямар ч эрхгүй боллоо.
Том намын толгойд очих нэг хэрэг. Харин уураг тархи нь байх амаргүй. Эдийн засгаа сэргээх "Шинэ эргэлтийн бодлого" ирээдүйн 30 жилийн хөгжлийн гараа болж чадах эсэх нь Ерөнхий сайд, МАН-ын дарга Л.Оюун-Эрдэнийн манлайллаас шууд хамаарна. Гараа сайн бол бариа сайн гэдэг үгтэй. Хилийн боомтуудын хүчин чадлыг нэмэгдүүлж, хувийн хэвшлээ бодитойгоор дэмжиж, хот хөдөөгийн ялгааг арилгаж, авлигачдад төмөр нүүр үзүүлж, усан цахилгаан станцуудаа бүтээн босгож, ухдаг биш ургуулдаг ХАА-н салбараа бодитой анхаарч чадвал хөгжлийн зам шуударч л таарна.
МАН-ын уриа лоозонгуудын үг нь биш удирдлагуудынх нь хандлага, үе солигдсон гэж найдъя. Монголын андгай за буй заа...
