Зураг дээр харагдаж байгаа тоонууд алдарт Галлиполийн тулалдааны өмнөх Францын армийн дарсны нөөц гэнэ. Лемнос, Грек, 1915 он.
Энэхүү тулалдаан Дэлхийн 1 дүгээр дайны үндсэн сөргөлдөгч талууд Холбоотнууд болох Их Британийн эзэнт гүрэн, Франц ба Османы эзэнт гүрний хооронд одоогийн Туркийн нутаг дахь Галлиполийн хойгт өрнөсөн бөгөөд хойгийн төлөө тулалдаан Осман буюу Туркийн талын тактикийн ялалтаар дууссан юм.
Галлиполийн хойг нь Газар дундын тэнгисийг Хар тэнгис (Босфорын хоолой нь Хар тэнгисийг Мраморын тэнгистэй, Дарданелийн хоолой нь Эгейн тэнгистэй тус тус холбодог бөгөөд Эгейн тэнгис нь Газар дундын тэнгисийн нэг хэсэг)-тэй холбох стратегийн өндөр ач холбогдолтой хойгийн баруун тал хэсэг болно.
Иймд Англи, Францчуудын зүгээс өөрийн холбоотон Оростой холбогдох усан замын найдвартай байдлыг хангах зорилготойгоор энэхүү тулалдааныг эхлүүлсэн боловч тэнгисийн болон хуурай газрын сунжирсан тулалдааны эцэст тэдний ялагдлаар дуусгавар болжээ.
Товчдоо дэлхийн 1 дүгээр дайнд ялагдсан Османы эзэнт гүрний үндэс суурин дээр шинэ Турк улсыг үүсгэн байгуулах үйл явц эндээс эхэлсэн гэж түүхчид үздэг.
Хачирхалтай нь жил бүрийн 4 дүгээр сарын 25-ны өдрийг тулалдаанд ялсан, ялагдсан 2 тал хоёулаа баярын өдөр болгон тэмдэглэдэг байна.
Ялагдсан Английн эзэнт гүрний бүрэлдэхүүнд цэргийн анги нэгтгэлээ илгээсэн Австрали, Шинэ Зеланд улсуудын хувьд бие даасан улс болон хөгжих үндэс суурь эндээс эхлэлтэй гэж үздэг бөгөөд ANZAC Day буюу “Австрали, Шинэ Зеландын цэргийн албан хаагчдын баяр”-ын өдрийг эдүгээ ч өргөн дэлгэр, ёслол төгөлдөр тэмдэглэдэг юм. Австрали, Шинэ Зеландын армийн дайчид 1915 оны дөрөвдүгээр сарын 25-нд Галлиполд буусан бөгөөд харамсалтай нь тэд асар их хохирол амсан ялагдал хүлээсэн аж.
Харин туркчуудын хувьд шинэ улсаа сэргээн бий болгох үзэл, санаа сэтгэлийн хатыг энэхүү тулалдаанаас олж авсан гэж үздэг. Тус хойгийг хамгаалан тулалдаж байсан нэгэн дивизийн захирагч Mustafa Kemal буюу Ататурк энэхүү тулалдаанд гарамгай гавьяа байгуулсан цэргийн зүтгэлтэн болсон төдийгүй хожим дайны дараа Турк улсыг үндэслэн байгуулж, тус улсын анхны ерөнхийлөгч болжээ. Энэхүү тулалдаанд Туркчүүд ялсанаар зөвхөн Газар дундын болон Хар тэнгисийг холбох усан замыг өөрийн хяналтдаа үлдээж чадсан төдийгүй тус улс хуучин нийслэл Константинопол (Одоогийн Истанбул) болон Турк улсын Европ тив дэх эзэмшил газрын аюулгүй байдал хангагдсан аж.
