Их Британийн цаг уурын алба тус улсын түүхэнд анх удаа хэт халалтын улмаас аюулын “улаан” төвшинг зарлалаа. Ойрын өдрүүдэд Лондон болон Манчестерээс Йорк хүртэлх төвийн бүсийн ихэнх нутгаар 41 хэм хүрч халах төлөвтэй байгаа бөгөөд энэ нь халуунд цохиулах, үхэлд хүргэх эрсдэлтэй.
Даваа гарагийн үдээс хойш Уэльст агаарын температур Цельсийн 37 хэмээс дээш болж рекорд температур бүртгэгдсэн байна. Дараа нь Английн зүүн хэсэгт 38.1 хэмийн халуун бүртгэгдсэн байна.
Хэт халуунтай тэмцэхийн тулд нэлээд гэнэтийн арга хэмжээ авч байна. Тухайлбал, хэд хэдэн хот өвлийн улиралд мөстсөн асфальтан дээр элс цацдаг машиныг зам дээр гаргажээ. Хэт халуунд тэд асфальтыг зөөлрүүлэхгүйн тулд гадаргуу дээр нь чулуун үйрмэг цацаж байна.
Сурагчдыг уламжлалт дүрэмт хувцас бус биеийн тамирын шорт, подволктой сургуульд ирэхийг зөвшөөрсөн.
Халуун агаарын давалгаа Европ тивд урд зүгээс ирж, арлуудын оршин суугчдад томоохон бэрхшээлүүдийг дагуулдаг.
Испанид халуунаас болж шувууд нисэж байх зуураа үхэж, хэт халалтын улмаас амиа алдагсдын тоо 350 гаруй болсон талаар гадаадын хэвлэлүүд мэдээлж байна. Хэд хэдэн бүс нутаг, түүнчлэн хөрш зэргэлдээ Португал, Францад ой хээрийн түймэр гарч байгаа бөгөөд хэд хэдэн гол мөрний усны хомсдолоос болж түймэртэй тэмцэхэд хүндрэлтэй байна. Жишээлбэл, тус тивийн хамгийн том усны артери болох Рейн, Эбро, Рон, По голуудад усны түвшин мэдэгдэхүйц буурч байна. Сүүлийн 70 жилийн ажиглалтын дүнгээр усны түвшний бууралт рекорд хэмжээнд хүрчээ.
Италид хүчтэй ган гачиг болж байгаа нь ургац хураалтад эргэлзээ төрүүлж байна, учир нь хамгийн консерватив тооцоогоор По гол нь Италийн нийт хөдөө аж ахуйн салбарын гуравны нэг орчмыг ус чийгээр хангадаг. Нөхцөл байдал маш хүнд байгаа тул олон хотын захиргаа усны хэрэглээний хязгаарлалтыг нэвтрүүлээд байна.
ХБНГУ-д асуудал өөр, гэхдээ багагүй хүндрэлтэй тулгараад байна. Рейн мөрний усны түвшин буурч байгаа нь далайн боомтоос цахилгаан станц руу усан онгоцоор нийлүүлдэг нүүрсний нийлүүлэлтийг тасалдуулах аюулд хүргэж байна. Берлин европчуудын ногоон эрчим хүчний шилжилтийн нэг хэсэг болгон орхихоор төлөвлөж байсан хатуу түлшний эрчим хүчний эх үүсвэрүүд рүү эргэн шилжихээс өөр аргагүй болсон. Ойрын хугацаанд өөр сонголт байхгүй гэдгийг Олаф Шольц гунигтайгаар хэлсэн.
Үүнээс гадна тариалангийн талбайн хязгаарлалтын улмаас саяхан Германы хамтрагчидтайгаа нэгдсэн Голландын фермерүүд олон нийтийн ажил хаялт зохион байгуулж байна. Магадгүй хэн нэгэн гайхах байх, гэхдээ энд ч гэсэн гол шалтгаан нь эрчим хүчний хямрал юм. Амстердам, Берлин хоёр тариаланчдаа дампууруулахыг хүссэндээ бус, харин шатахууны хомсдолд гүн гүнзгий орж, эдийн засгийн хязгаарлалт тавьсаныхаа хариуг иймэрхүү янзаар хүртэж буй нь энэ юм.
