Хүмүүс бидний тосгуур, суултуур руугаа урсгасан ус, бохирдлууд хаа хүрч, хэрхэн цэвэрлэгддэг талаар та бодож үзэж байсан уу??? Хэн нэгэн тэр бүхнийг цэвэрлэх нь тэдний ажил үүрэг, надад хамаатай зүйл биш гэж бодож сууна уу? Хэдий тийм ч иргэдийн хайхрамжгүй үйлдэл, буруу хэвшлүүд төв цэвэрлэх байгууламжийн ажилд нэлээд саад учруулж, эргээд энэ нь байгаль орчин, бидний эрүүл мэндтэй холбогддог тул бидэнд анхаарах багагүй зүйүүд байна!!! Мэргэжлийн хүмүүсийн хэлснээр ариун цэврийн суултууртаа хийдэг ахуйн хог хаягдал, үс ноос, зарим үйлдэрүүдийн хэт их бохирдолтой ус цэвэрлэх байгууламжийн үйл ажиллагаанд багагүй бэрхшээлийг үүсгэдэг байна. Цэвэрлэх байгууламжийн бохир усанд агуулагдаж буй том овор хэмжээтэй хог хаягдлыг шүүх үүрэг бүхий хүлээн авах сараалж үс, ноос, хог хаягдалд бөглөрөх нь энгийн үзэгдэл. Уг дамжлагаар хоногт 1500-2000кг хог хаягдлыг шүүн авч зайлуулах ажил хийдэг бөгөөд үүний 50% нь ноос, үс хялгас эзэлдэг байна. Насосны ажлын дугуй, шугам хоолой хаалтанд ноос орж бөглөснөөс өдөрт 10-15 удаа задлаж хог, ноосыг авч байж хэвийн ажиллагааг хангахаас аргагүйд хүрдэг ажээ.
Мөн гадна ирж байгаа бохир ус хэт өндөр бохирдолтой, химийн бохирдол давамгайлбал лаг хүлээн авах 300м3 эзэлхүүнтэй тогтворжуулах резервуарт хорт хий ихээр үүсэж үнэрийн тархалт нэмэгдэж, хөдөлмөрийн аюулгүй байдал алдагдахад хүрдэг байна.
Одоогийн байдлаар төв цэвэрлэх байгууламж нь 140 ажилтантай, хоногт дунджаар 160000-200000м3 бохир усыг хүлээн авч механик, биологийн цэвэрлэгээг хийн, хлор болон хэт ягаан туяагаар халдваргүйжүүлж Туул голд нийлүүлж байна. Үс ноос, хэт их өөх тос, ариун цэврийн цаас зэргийг суултууртаа хийгүй байх нь цэвэрлэх байгууламжийнхандаа тус дэм болж буй иргэн таны дэмжлэг, хувь нэмэр гэдгийг онцлон сануулъя.
